ലക്ഷ്യസ്ഥാനം
ചുവപ്പ് വെളിച്ചം പ്രസരിപ്പിച്ചു
"വഴിമാറിത്തരുവിൻ വേഗം "
ദീനമാം മുറവിളിയോടതാ,
ആംബുലൻസതിവേഗത്തിൽ,
ചീറിപ്പാഞ്ഞണഞ്ഞീടുന്നു.
അതുകണ്ട് പലരും വഴിമാറി,
പക്ഷേ,യൊരുവന്നതിബുദ്ധിമാൻ
ആംബുലൻസിൻ തൊട്ടുപിന്നാലെ-
യതിവേഗം തന്നെ ബൈക്കിൽ
പായുന്നു,പറയുന്നിത്ഥം
"ബ്ലോക്കില്ലാതെ",വേഗത്തിൽ
ലക്ഷ്യസ്ഥാനത്തണയുവാൻ
ഇതു നല്ലോരെളുപ്പവഴി.
പെട്ടെന്നതിബുദ്ധിമാൻ യാത്രികൻ
വെട്ടിത്തിരിയുന്നോരാംബുലൻസിൻ
പിന്നിൽ മുട്ടി, തട്ടിത്താഴെ വീഴുന്നു.
നാട്ടുകാരോടിയെത്തുന്നു .
ശോണിതത്തിലഭിഷിക്തനാം
കഷ്ടം!ബൈക്ക് സഞ്ചാരി
ആംബുലൻസിലേറി തന്നെ
തൻ ലക്ഷ്യസ്ഥാനത്തതിവേഗം
എത്തിച്ചേർന്നത് കണ്ടാലും.... .
No comments:
Post a Comment