മോഹം മോഹനം
മോഹങ്ങളില്ലാത്ത മാനവനാരുണ്ട്?
മോഹനസുന്ദരസ്വപ്നങ്ങളുമായി
താരാപഥങ്ങളിൽ വ്യാപരിച്ചീടുവാൻ
പാരം കൊതിയേറിയുല്പതിച്ചീടുവാൻ
ചീറിയുയരുന്ന റോക്കറ്റിലേറി നാം
ഏറെനാൾ ഗഗനചാരിയായ് മാറിയോ?
ഓരോനവഗ്രഹങ്ങളതോരോന്നായ്
പാരാതെ മർത്യന്റെ കാലടി വച്ചിടും
ഓരോരോ നേട്ടങ്ങൾ മർത്യൻ വരിച്ചിടും
നേരുള്ള നിത്യപരിശ്രമം ചെയ്കയാൽ!!
മോഹങ്ങൾ മാത്രമായ് മർത്യപുരോഗതി
സാഹസമില്ലാതെ കൈവന്നു ചേരുമോ?
സാഹസികമായ സംരംഭമില്ലെങ്കിൽ
മോഹം വൃഥാമോഹമായങ്ങു മാറിടും!
മോഹനം,മോഹനമാകുമീമോഹങ്ങൾ
വ്യാമോഹമായിപ്പരിണമിച്ചീടാതെ
ആമോദമേകുന്ന മോഹങ്ങളായവ
ആജീവനാന്തം തിളങ്ങട്ടെ മാനസ്സേ...!
