കാവ്യാംഗനയോട്
നീ വരൂ കാവ്യദേവാംഗനേ വരൂ..
മാമകഹൃത്തിൻ രോമാഞ്ചമായ് വരൂ..
മനസ്സില്‍ വിരിയുന്ന മോഹപുഷ്പങ്ങളില്‍
മധു തേടിയെത്തുന്ന ശലഭമായ്‌ നീ വരൂ..
പുല്‍ക്കൊടിത്തുമ്പിലെ നീഹാരബിന്ദുവില്‍
തെളിയുന്ന മഴവില്ലിന്‍ ശോഭയായ് നീ വരൂ..
തീരത്തിലലതല്ലും കടലിന്റെ ദുഖമായ്‌
ദീനന്റെ നേര്‍ത്ത വിലാപമായ്‌ നീ വരൂ..
ഈണത്തില്‍ ഒഴുകുന്ന മുരളിതന്‍ ഗാനമായ്
പ്രേമത്തിന്‍ അമൃതപ്രവാഹമായ് നീ വരൂ..
ധീരന്റെ മനസ്സിലെ ഭാവമായ്‌, രണ-
വീരന്റെ പടഹധ്വനിയായ് നീ വരൂ..
നര്‍ത്തനമാടുന്നൊരപ്സരകന്യതന്‍
പുരികത്തിന്നിന്ദ്രധനുസ്സായ് നീ വരൂ..
അങ്കണത്തില്‍, മുട്ടിലിഴയുന്ന പൈതലിന്‍
മന്ദസ്മിതത്തിന്നൊളിയായ്‌ നീ വരൂ..
നീ വരൂ കാവ്യദേവാംഗനേ വരൂ..
നീറും മനസ്സിന്റെ സ്വപ്നമായ്‌ നീ വരൂ..
നീരജത്തിലെ പുണ്യമേ നീ വരൂ
നീ വരൂ കാവ്യദേവാംഗനേ വരൂ..
No comments:
Post a Comment